Festivalit tamarmik ataasiakkaarlutik UNESCO’p ‘Atlas of the World’s Languages in Danger’-imi (Nunarsuarmi oqaatsit navianartorsiortut) nalunaarsorneqarsimasut ilaannik ataatsimik sammisaqartassapput. Filmfestivalip suulluunniit isumaa tassaavoq piffissap killeqartup iluani pisassammat, taamalu kikkut tamarmik saqqummiunneqartussanik isiginnaarsinnaanerat piffissakkut killeqareerlunilu qaangiutilertortarpoq. Aamma 639 festivali taamaappoq. Taamaakkaluarli naak filminik takutitsisarnerit amerlanianngikkaluartut piffissamilu killeqartarniaraluartut piukkunnartua naggaterpiaagullu anguniagaasoq tassaavoq isiginnaartut sunnernissai. Filmit isiginnaartup silarsuarmik paasinninnerata annertusarnissaanut apeqqusernissaanullu aqqutissiuussisinnaapput. Filmit ilusaasa sannaasalu kikkunnut tamanut pilerinassuseqarnerat pissutigalugu oqaatsit navianartorsiortut atatinniarsarinerannut sakkussatsialattut atorneqarsinnaapput, tassa isiginnaartup isai filmikkut sammineqartup pingaaruteqassusianut immaqa uisinneqarsinnaammata; inuiaqatigiinni qanoq inssisimaneq imaluunniit qanoq tunuliaqutaqarneq apeqqutaatinnagit isiginnaartartut amerlanersaasa filmip isiginnaarnerata kingorna isiginnaagartik eqqartortarpaat. Tassaavorlu 639 festivalip naatsorsuutigisaa.

Filminik takutitsisarnerit saniatigut oqaloqatiginninnerit aamma apersuinerit festivalikkut aallakaatinneqartassapput. 639 festivalip siunertaa tassaavoq oqalliffimmik ammasumik unneqqarissumillu pilersitsinissaq, ilisimasanik siammarterineq/avitseqatigiinneq aammattaaq isumalioqatigiinneq kingorna festivali najuunnani aaqqissuussaq qaangiutereerpat ingerlasinnaajumaartoq – taamaaqqunaqaarlu.